Likau da-a Po 
Harei siam tuk tanyruah
Harei ligaih tuk makrâ
Po deh di danaok
Po daok di Cam.

Aia patil aia pata
Po kalung papah thah tagei
hala nduen hala khai
lisei sapluh limâ salao
ahar thong ahar cambah.

Manuk yau
akaok takai hatai hajai
phik la aguen.

Hadiip pasang muk Juk
duah hu ngao jieng
thau phuel thau yaom
ka Po muk Po kei
Po Praok Po Patra
Po Patri Po Nabi Daliwet
dalam sang dalam danaok
bilan Katé bilan Cambur 
bilan than uh bilan than auen
Po dai thau dai hamiit
juai aen juai kaden.

Likau da-a Po
liéng phuel liéng yaom
liéng likau liéng kunâ
liéng pajiak liéng pajieng
saong mbeng trah tho
mbeng trah angan
trah harak trah agal
thraiy juai kandong
anak dam klaong juai kawak.

Dei tra likau mbai padaong
tapeng paga ala sang
hadiip hataom[pataom] pasang
anak hataom amaik
suma hataom matuw
cek hataom tacaow
adei hataom sa-ai
mik hataom kamuen.

Saong mbai padaong
jalan nao jalan mai
jalan trun jalan tagok
pandiak praong padaong di Po 
rimbuk praong padaong di Po 
nao tel cek wek tel sang
nao tel glai mai tel sang
akaok yau basei drei yau haban
akaok yau basei drei yau tali
thei brei Po brei
thei pajieng Po pajieng
laik likei daok likei
laik kamei daok kamei.

Likei ngap kajang lang ciéw 
tiap asau raow manuk 
kumei daok di khan di aw 
taik khan tamâ khan 
taik aw tamâ aw 
ka Po Muk Po Kei 
Po praok Po Patra 
Po Patri Po Nâbi Daliwet 
ngap dhaong jieng dhaong 
ngap kanu jieng kanu 
ngap hamu hu padai 
nao raglai hu tangey 
ngap hamu sa phun sa taok 
sa laok sa ribuw 
sa phun sa taok 
sa laok sa tamân 
ndom saong yuen ranam 
ndom saong cam anit 
peh pabah klao 
urang kacaw mâh brei 
peh pabah puec 
urang kuec mâh brei.

Anâk tacaow Po 
daok dom ro rah kakah kaghak 
likau di Po 
juai aen kaden hanaik kajaok 
thei jhak hatai iniai yak 
Po paoh mbaok mâng likuk 
mbuk mâng anak 
ngap mbeng hu ginup jieng mâda 
yak yum jum pataom 
yau rakaom mâng baoh di aia 
yau caraoh bak banâk 
mâk oh mada thraok 
jhaok oh mada karang 
kheng yau Po tanâh Po riya 
thei caong oh taklok 
thei rok oh magei 
ribuw thun tamân thun.

Haiy laih....!! 
likau thuk kunâ siam 
likau kajep kunâ karo 
Po brei Po pajieng 
oh mâng da hu hagait tra,,,,

Sohaniim _ Sưu tầm.